ВЕРМИЛИОН

Петар Пан во Институтот за белодробни заболувања кај децата

2008-04-02T19:37:00.012+01:00

На 2 април 2008, Петар Пан и неговата пријателка вилата Ѕвончичка ги посетија децата кои се лекуваат во Институтот за белодробни заболувања во Козле. Тие не само што на дечињата во болницата им пренесоа дел од чудесната земја Недојдија, туку и им ја подарија книгата „Петар Пан во црвено“ од Џералдин Макоркран.

Оваа книга е дел од донацијата која издавачката куќа Вермилион му ја додели на Институтот за белодробни заболувања. Останатиот дел од донацијата се состои од парична поддршка за работата на Институтот. Средствата од донацијата, според директорот на Институтот, ќе бидат искористени за купување на компјутерска опрема која ќе помогне хоспитализираните деца и персоналот од Институтот да имаат пристап до што повеќе информации користејќи интернет.

На овој ист ден целиот свет го одбележува Светскиот ден на книгата за деца и го промовира и поттикнува читањето на книги. Децата преку различните приказни се запознаваат со различните култури, различните начини на живот и израснуваат во личности кои имаат поголемо разбирање за светот во кој живеат. Се надеваме дека иницијативата ќе ги поттикне и родителите што повеќе да им читаат на своите деца и читањето да прерасне во семејна активност, на тој начин негувајќи ја оваа значајна вештина за децата.

НАГРАДЕН КОНКУРС

2008-04-02T07:22:00.003+01:00

По повод 2 април, светскиот ден на литературата за деца
Издавачката куќа “ВЕРМИЛИОН” распишува

НАГРАДЕН КОНКУРС
ЗА КНИГА ЗА ДЕЦА КОЈА ПРОМОВИРА КУЛТУРА НА МИР

Право на учество на конкурсот имаат сите граѓани на Република Македонија. Пристигнатите дела треба да ги исполнуваат следните услови:

• Да бидат оригинални дела на македонски јазик и не смеат да бидат претходно објавувани;
• Да спаѓаат во жанрот роман или збирка раскази за деца;
• Да бидат наменети за деца од 8-14 годишна возраст;
• Да ги поттикнуваат децата да ги прифаќаат разликите и да одбиваат секаков вид на дискриминација, да ги прават поотворени кон другите култури и начини на живот и да ги промовираат концептите и идеите на толеранцијата и мирот.

Најдобрата необјавена книга за деца во служба на мирот и толеранцијата ќе биде наградена со откупна парична награда од 30.000 денари и ќе биде објавена.

Конкурсот е анонимен. Текстовите во електронски облик (компакт диск или дискета) треба да се предадат најдоцна до 15 септември 2008 година, во шифриран плик испратен на следната адреса:

ВЕРМИЛИОН
П.Фах 288
1001 Скопје

Во друг, посебно означен плик, што ќе биде отворен по изборот, треба да биде наведена шифрата и контакт информации за авторот на делото.

Доставените дела не се враќаат. Дозволени се номинации само од авторите на делата. Одлуката на жирито е конечна.

Учесниците ќе бидат известени за резултатите од конкурсот најдоцна до 15 ноември 2008. Свеченото доделување на наградата и претставувањето на објавеното дело ќе биде на 2 април 2009 година.

Дигитални библиотеки за деца

2008-03-26T08:33:00.007+01:00

Дигиталните библиотеки се организирани колекции на дигитални содржини кои е достапни до широката јавност. Можат да содржат материјали кои биле дигитализирани, како што се дигитални копии на книги или други материјали од библиотеки и архиви или пак материјали кои во оригинал биле продуцирани како дигитални. Овие информации се достапни преку компјутер и интернет врска.

Едни од најстарите и најпознатите дигитални библиотеки се Проектот Персеj , Проектот Гутенберг и ибиблио.

Предноста на дигиталните библиотеки е тоа што се лесно достапни, имаат повеќе простор од традиционалните библиотеки, полесни се за одржување и се поевтини.

А сега замислете библиотека каде книгите се подредени по боја и по форма или според тоа какви чувства будат. Ваква е Меѓународната детска дигитална библиотека . Тука можете да најдете околу 200 книги за деца од различни земји од светот и на различни светски јазици. Три од книгите се на македонски јазик, а другите можете да ги искористите да научите некој од светските јазици.

Друга дигитална библиотека на која можете да најдете книги од околу 47 европски земји и нивните национални библиотеки е Европската библиотека . Во неа има и неколку колекции на книги за деца. Потоа, можете да ги погледнете и Болдвин Проектот за литература за деца, Болдвин библиотеката за литература за деца, Книги за деца на интернет Розета проект, Светско училиште.

Во Македонија сега за сега дигитални книги можете да најдете на интернет страната на Библиотеката „Браќа Миладиновци“ .

Илустрациите во книгите за деца конечно добиваат признание

2008-03-11T12:29:00.005+01:00

Не е „Мона Лиза“ ниту пак „Мајката на Вистлер“, но сликите како „Многу гладната гасеница“ или други познати илустрации од книгите за деца се стекнуваат со почит во високите уметнички кругови.
Иако некогаш се сметаше за жанр кој е забавен, но кој лесно се заборава, тој сé почесто станува дел од музејските колекции и се изучува на часовите во уметничките училишта.
Истовремено, како што расте почитта за уметноста во книгите за деца, следат и парите. Колекционерите ги купуваат илустрациите како инвестиција. Експертите велат дека сигурен знак дека некој жанр е прифатен е кога музеите, колекционерите и филантропите се подготвени да ги отворат паричниците, а ова сé почесто е случај со уметноста за деца.
„Оваа уметничка форма не се вреднува колку што заслужува иако големите илустратори на книги за деца работата под влијание на историјата на уметноста и модерните трендови,“ вели Х. Николс Б. Кларк, директор на музејот Карл (Carle Museum), во кој изложуваат бројни уметници и во чија постојана колекција се делата од долгогодишната кариера на Ерик Карл, вклучувајќи ја и „Гладната гасеница“.
Музејот Такома, Уметничкиот институт од Чикаго и Новобританскиот музеј за американска уметност од Конетикат во својата програма имаа изложби на илустрации за деца. „Не можам да кажам дека ги гледаме исто како што би гледале еден Моне, но сепак мислам дека им се посветува сé повеќе внимание,“ вели Џин Сауса, директорот на Уметничкиот институт од Чикаго. „Тоа е посебна дисциплина. Не мора да се натпреварува со Моне и сличните на него бидејќи има своја посебна вредност како уметност.“

(извадок од текст на STEPHANIE REITZ Associated Press)

„Водниот коњ“ на филм

2007-12-24T10:19:00.000+01:00

Утре, 25 декември 2007 година, се очекува премиерата на волшебниот филм за едно пријателство, базиран на книгата „Водниот коњ“ од Дик Кинг-Смит. Иако до некаде различна од онаа во книгата, приказната е забавна и ќе ја разбуди вашата фантазија без разлика на годините. Се зборува за односот на едно семејство и едно необично животно.

Допирајќи ја универзалната тема за магијата на пријателството, низ згодите со Крузо малиот Ангус созрева и учи да ја прифаќа реалноста.

Највозбудливиот дел од филмот се водните и подводните пловења на малиот Ангус на грбот на чудовиштето од Лох Нес.

Со еден збор одличен семеен филм.

Книгата на Дик Кинг-Смит можете да ја очекувате во книжарниците на македонски јазик во текот на февруари 2008 година во издание на Вермилион.

Ден на ненасилството

2007-10-02T09:30:00.000+01:00

Генералното собрание на Обединетите нации го прогласи 2 октомври – роденденот на Махатма Ганди – за Меѓународен ден на ненасилството со цел да се промовира пораката на мирот низ цел свет. Иницијативата потекнала пред неколку години од децата, главно од Јапонија и Кореа, кои посетувале курс по англиски јазик во Париз и гледале филм за Ганди.

Индискиот лидер за независност употребувајќи нов начин за масовна мобилизација и ненасилна акција, го собори колонијализмот и ги зацврсти корените на граѓанските, политичките и економските права. Со ова инспирираше и многу други борци за слобода како Нелсон Мандела и Мартин Лутер Кинг.

Собранието на ОН сакајќи да обезбеди култура на мир, толеранција, разбирање и ненасилство ги повика државите, телата на ОН, регионалните и невладините организации и поединците да го одбележат Денот на ненасилството преку едукација и подигање на јавната свест.

Вермилион во сите свои активности ги следи принципите на промовирање на културата на мир и ненасилството. За таа цел распишавме и откупен конкурс за книга за деца која ги промовира овие вредности. Крајниот рок за конкурирање наближува. Побрзајте и пријавете се.

Златно перо за „Петар Пан во црвено“

2007-09-28T22:51:00.000+01:00

Под мотото „Не го убивајте гласникот“, Меѓународната федерација на преведувачи на 30 септември го прославува Меѓународниот ден на преведувачите.

Во Македонија, како и секоја година и оваа по овој повод, Советот на Меѓународната средба на книжевни преведувачи – Тетово ги додели наградите за книжевен превод на дело објавенo во изминатата година.

Меѓу доделените награди, особена чест ни е што добитник на наградата Златно перо е Марија Тодорова за својот превод од англиски на македонски јазик на делото „Петар Пан во црвено“ од Џералдин Макоркран, во издание на Вермилион.

„Петар Пан во црвено“ е првото официјално продолжение на оригиналниот „Петар Пан“ од Џ.М. Бери.

Со секоја купена книга, читателите на „Петар Пан во црвено“ помагаат да се подобрат условите во кои се лекуваат децата на Институтот за белодробни заболувања - Козле.

Европски ден на јазиците

2007-09-26T12:06:00.000+01:00

Кон крајот на 2001, годината на јазиците, Советот на Европа го прогласи 26 септември секоја година за Европски ден на јазиците. Целта е низ Европа да се поттикне учењето на јазици. Во чест на овој ден насекаде низ Европа се организираат различни настани за деца, телевизиски и радио програми, курсеви за јазици и конференции.

Европската унија води политика на повеќејазичност. На Самитот во 2002 година во Барцелона се постави цел децата уште од мали да учат два странски јазика. Повеќејазичноста во ЕУ е поврзана со мобилноста на работниците и европската економија.

Европската унија инвестира повеќе од 30 милиони евра годишно за промовирање на учењето на јазици и лингвистичката разноврсност преку програмите Сократес и Леонардо да Винчи.

Меѓународен ден на мирот

2007-09-25T18:21:00.000+01:00

Уште во 1981 година Генералното собрание на Обединети нации прогласи Меѓународен ден на мирот. Во 2001 година за Меѓународен ден на мирот беше прогласен 21 септември.

Резолуцијата вели: „Меѓународниот ден на мирот е ден за глобално прекинување на огнот и за ненасилство, покана до сите нации и луѓе на тој денот да ги прекинат сите непријателства...“

„Ги повикува сите земји членки, организации во системот на Обединетите нации и невладините организациии, сите лица на соодветен начин да го одбележат Меѓународниот ден на мирот, вклучувајќи образовни активности и подигање на јавната свест, како и соработка со Обединетите нации во воспоставување на глобално прекинување на огнот.“

Овој ден нуди можност поединците, организациите и нациите на ист ден да изведат практични активности за мир. На овој ден, милиони луѓе учествуваат на настани како што се концерти, работилници и собири за мир.

Во своето обраќање по повод Денот на мирот оваа година, Генералниот секретар Бан Ки Мун изјави дека „Мирот е највисоката цел на Обединетите нации.“

Меѓутоа, во годината има уште 364 дена за делување во полза на мирот. Како инспирација можете да ја погледнете или некому на глас да му ја прочитате интересната приказна за Децата на мирот.

Светски ден на писменоста

2007-09-12T21:35:00.000+01:00

8 септември е прогласен од УНЕСКО за Ден на писменоста. Оваа година темата на која е ставен посебен акцент е „Писменоста и здравјето“. Во чест на Денот на писменоста, на Африканската регионална конференција за глобална писменост која се одржа на 10 септември во Бамако, Мали, УНЕСКО ги додели Наградите за писменост. Овие награди се доделуваат секоја година како признание за посебен придонес во борбата против неписменост.

Еден од петте добитници на награди е Проектот за книги за деца во Танзанија, невладина организација која работи на создавањето на култура на читање помеѓу младите, но и меѓу возрасните, преку зајакнување на локалната издавачка индустрија. Друг е организацијата Посегни и прочитај од САД која соработува со здравствените установи за да допре до децата од најсиромашните семејства кои најчесто не завршуваат училиште, промовирајќи писменост и култура на читање.

И неколку писатели се приклучија кон борбата на УНЕСКО против неписменоста. „Писателите за писменост“ е иницијатива во која учествуваат писатели како Маргарет Атвуд, Надин Годимер, Тони Морисон, Пауло Коељо и многу други. Во новата публикација на УНЕСКО, „Азбука на надежта“ , овие и други светски мајстори на пишаниот збор се залагаат за писменост за сите жители на нашата планета.

(фото: © UNESCO)

Наскоро во книжарниците

2007-08-19T11:20:00.001+01:00

К.В. Јохансен - Тори и принцот-змија

„Тори и принцот-змија“ е магична авантура полна со акција и неодолив хумор.

Откако некој ќе го киднапира престолонаследникот Лијас и никој нема да се пријави за да го спаси, Тори и Оревче сфаќаат дека е време да преземат нешто. Двајцата пријатели патуваат низ планините, низ шумата, каде мораат да се справат со гоблинот шпион, лутата и смртоносна горска вила и загатката на пејачката Враноперка. Овие средби им помагаат да откријат како да го ослободат принцот и повторно да му го вратат човечкиот облик.

Ако ви се допадна оваа книга ќе ги сакате и другите три во серијата:
„Тори и змејот“
„Тори и жар птицата“
„Тори и пиратската кралица

Криста Јохансен е авторка на шест книги за деца, една историја на детската литература и серија на сликовници. Живее во Саквил, Њу Брунсвик, Канада. Кога била мала најмногу сакала да чита и да шета со своето куче низ пасиштата и шумите.

К.В Јохансен смета дека најважното нешто што треба да го направиш додека си млад и ако сакаш да пишуваш е да читаш многу, да се обидуваш да пишуваш и да се усовршуваш. Треба да ги читаш и добрите автори што пишувале порано, а не само најновите и најпопуларните книги.

Дик Кинг Смит - Водниот коњ

„Водното коњче“ е прекрасна приказна за читање на глас. Кога осумгодишната Кирсти го донесе дома необичното јајце што го најде на брегот на Шкотска, нејзиното семејство не ни сонуваше дека ќе се изведе. Но следниот ден Кирсти во кадата најде малечко морско чудовиште! Дел коњ, дел жаба, дел желка и дел крокодил, ова беше најнеобичното суштество што го имаа видено. Само дедото на Кирсти знае што е - воден коњ!

Милото суштество беше совршено домашно милениче. Единствениот проблем е што не престануваше да расте! Ќе му најдат ли доволно голем дом на водното коњче?

Авторот Дик Кинг Смит најчесто пишува за животни: селските фантазии, како што тој сака да ги нарекува, му се најомилени. Сака да пишува за деца, да се среќава со децата кои ги читаат неговите книги и кои уживаат во она што тој го создава.

Неодамна можевте да ги гледате екранизациите на две негови книги: „Бејб, галантното прасе“ (добитник на Оскар во 1995 година) и „Мрежата на Шарлота“.

Размени книга

2007-08-16T21:16:00.000+01:00

Имаш книги кои не ти се потребни и само фаќаат прашина на полиците? Книгата што сакаш да ја прочиташ ја нема во книжарниците во Македонија?

За сите оние кои го користат прекрасниот свет на интернетот постои решение: интернет страници за размена на книги. На нив читатели од целиот свет разменуваат книги на различни јазици. Размената на книги по електронски пат станува сé попопуларна низ светот, па зошто да не се придружиш и ти.

Вистинските љубители на книги никогаш нема да фрлат книга, дури и кога знаат дека никогаш повеќе нема да ја читаат. Секогаш се обидуваат на своите книги да им најдат добар втор дом кај некој кој ќе знае да ги цени и да се грижи за нив. Од друга страна, за да ја најдеш вистинската книга, мораш да пробуваш, да истражуваш, да читаш најразлични книги. Понекогаш книгата што ја бараш повеќе не се печати, ниту може да се купи. Затоа многу љубителите на книги се чести посетители на штандовите за користени книги, во потрага по книгата која ќе им понуди ново доживување по цена што можат да си ја дозволат.

Интернет страниците за размена на книги ти го овозможуваат токму тоа: да го добиеш насловот што го сакаш, од друг корисник кому таа книга веќе не му е потребна. Испробавме десетина од светските станици за размена на книги и би можеле да ги препорачаме следните кои се достапни за корисници од Македонија:

BookMooch
TitleTrader
SF-books
bookcrossing

Иако секоја страница користи малку поинаков пристап, основниот концепт е горе-долу ист и многу едноставен. Се регистрираш на страната, ги регистрираш книгите што повеќе не ти требаат и сакаш да ги размениш, а потоа се обраќаш до други корисници кои ги имаат книгите кои ги посакуваш. Книгата што ќе ја побараш стигнува по пошта. По месеци и години фаќање прашина на некоја полица, конечно има нов сопственик.

Книгата што ќе ја добиеш е сосема бесплатна. Како што веќе спомнав, единствениот трошок е поштарината што треба да ја платиш за да испратиш книга кога ќе биде побарана од тебе. Совет: ако ја праќаш како печатен материјал ќе те чини поевтино. Со секое пракање на книга собираш поени за барање на нови книги.

На овој начин не само што добиваш евтини книги туку ги рециклираш книгите кои веќе не ти се потребни и ја намалуваш потрошувачката на хартија. Како што гледаш идејата е добра и изводлива, останува уште да ја направиме и кај нас.

Но ако повеќе сакаш да бидеш првиот кој ќе знае што ќе се случи со твојот омилен јунак, и сакаш нова, а не користена, книга тогаш останува да отидеш во книжарница и да си ја купиш.

Преведувачи за деца

2007-07-06T20:47:00.001+01:00

Translators 4 Kids (T4K) е непрофитна организација која обединува преведувачи и луѓе од цел свет кои го сакаат јазикот. Целта на организацијата е да ги користи зборовите за доброто на децата од целиот свет.

Првичниот проект на организацијата е да објави збирка на приказни, напишани од деца од целиот свет. Книгата ќе биде преведена на различни јазици и ќе биде достапна во колку што е можно повеќе земји. Добивката од продажбата на книгата ќе биде искористена за да се најде решение за проблемите со кои многу деца од светот се соочуваат секојдневно.

Идните проекти опфаќаат:

објавување на проекти на други медиуми, како што е CD, со цел да им се помогне на децата
развивање на систем во кој преведувачите ќе бидат културни амбасадори кои ќе се залагаат за правата на децата
создавање на врски со сите хуманитарни организации кои помагаат за грижа и добросостојба на децата
развој на корпоративни и приватни програми за спонзорства кои ќе ја движат организацијата и ќе помагаат во остварувањето на нејзината мисија

И вие можете да помогнете преку Translators 4 Kids ако сакате да волонтирате или да донирате.

Преводот и културната разноликост

2007-06-04T16:30:00.000+01:00

Генералното Собрание на Обединетите Нации ја прогласи 2008 година за меѓународна година на јазиците. Целта е да се промовира единството преку лингвистичката разноликост, пишува во нивното известување за печат. Собранието ги повика државите и Секретаријатот да работат заедно на заштита на сите јазици во светот и побара од Секретаријатот да назначи координатор за повеќејазичност. Претставниците од Андора изјавија дека: „Заштитата на јазиците е еден од основните столбови на културната разноликост“.

Светот се движи, а комуникацијата игра сé позначајна улога. Сепак, треба ли сложеноста на оваа ситуација да нé натера да прифатиме lingua franca само за да стане поедноставно или треба да ги браниме нашите различни идентитети, културната разноликост и малите јазици? Одговорот е сосема јасен, а УНЕСКО го вметна во својата Универзална декларација за културна разноликост: „Културната разноликост е неопходна за човештвото колку што е биолошката разноликост неопходна за природата“.

Никаде не е нагласено, но оваа разноликост не би можела да биде загарантирана да не е дискретното присуство – омниприсуството – на преводот. Обиди се и замисли само еден единствен ден без превод? Преведувачите се во с’ржта на комуникацијата, вечни пренесувачи на идеите и акциите кои го движат светот во кој живееме. Преведувањето е во срцето на човечката интеракција и ги чува нашите различни култури и лингвистички идентитети.

Постојат многу различни начини како да се постигне ова, но еден од најзначајните е преведувањето на литературата. Литературата ја одразува душата на една нација, а изложеноста на литературата на другите народи ни помага подобро да развиеме почит за сето богатство што постои.

Кампања за „зелена“ издавачка индустрија

2007-05-10T13:35:00.000+01:00

Организацијата за заштита на животната средина Greenpeace започна кампања која има за цел да ја направи издавачката индустрија „позелена“. Причина за тоа е фактот што издавачите на книги, a меѓу нив и оние кои печатат книги и сликовници за деца, се директни уништувачи на старите шуми.

Први кои се приклучија на кампањата се околу 72 издавачки куќи од Канада. Ним им се придружија и издавачи од Европа. Во Велика Британија два од петте најголеми издавачи воведоа нова политика за користење на хартија. Во Шпанија, петнаесет наслови и повеќе од 700.000 примероци се испечатени на рециклирана хартија, а истото се случи и со повеќе од 130.000 книги во Италија.

Најголемиот издавач во Германија, Random House Germany, сите свои наслови ги печати на хартија сертифицирана од Forest Stewardship Council. Неколку нови наслови во Франција и Белгија се испечатени на рециклирана хартија, вклучувајќи ја и последната книга од серијата Хари Потер, „Хари Потер и принцот со мешана крв“.

Покрај Џ.К. Роулинг и други светски познати автори како Јан Ранкин, Гинтер Грас и Изабел Аљенде соработуваат со Greenpeace за нивните идни книги да бидат печатени на рециклирана хартија или хартија со сертификат од Forest Stewardship Council (FSC).

Секоја година милиони хектари стара шума се сече и преработува за потребите на меѓународни компании во евтин градежен материјал и други производи од дрво, вклучувајќи и хартија.

Водени од грижата за животната средина, во издавачката куќа Вермилион решивме нашето издание „ Петар Пан во црвено“, но и сите идни изданија на оваа куќа да бидат печатени на рециклирана хартија. Иако само мал, сметаме дека со овој чекор ќе ја заштитиме природната околина во која живееме, но ќе поттикнеме и други да ни се придружат.