27 April 2015

Магде Ленче

Во издание на Вермилион наскоро ќе можете да ја прочитате најновата книга на македонскиот писател за деца Петре Димовски. Романот "МагдеЛенче" е добитник на наградата на Вермилион во 2014 година. Во ова дело на Димовски, жири-комисијата нагласува дека "солидно е доловена детската психологија и емоционалност за неколку ’тешки’ животни искушенија и загуби, и тоа е можеби најзначајниот аспект на овој роман,  а се разбира дека квалитетот и на другите нивоа не изостанува". Романот е приказна за малата Магделенче, Маѓичното Езеро и Езерската Принцеза, каде „вистината е фикција, а фикцијата е вистина“.

Петре Димовски досега објавил повеќе од 20 дела, романи, збирки раскази и  монодрами. Покрај за деца и млади, пишува и дела за возрасни. За своето литературно творештво досега има добиено повеќе награди и признанија, меѓу кои и наградата „Ванчо Николески“ за најдобра книга за деца во 2008 година, за книгата "Големата авантура". Неодамна беше добитник на втората награда за краток расказ која ја доделува весникот "Нова Македонија", како и на наградата "Прозни мајстори" на фондацијата "Македонија презент". Димовски е носител и на посебно признание од "Битолски весник". За проектот „Македонска книжевност” Димовски го приредил и изборот од македонски раскази за деца. Тој живее и твори во Битола.

Наградата Вермилион се доделува за прозно необјвено дело наменето за деца од 8 до 14 годишна возраст, кое ги поттикнува децата да ги прифаќаат разликите и да одбиваат секаков вид дискриминација, ги прават поотворени кон другите култури и начини на живот и ги промовира концептите и идеите на толеранција и мир. Наградата се доделува по повод 2 април, роденденот на познатиот дански писател за деца Ханс Кристијан Андерсен, кој во светски рамки се одбележува како Меѓународен ден на литературата за деца.