29 February 2012

Две нови книги - два змеја

Две нови изданија од наградени современи авторки за деца кои за првпат се претставуваат пред македонската публика излегоа од печат од издавачката куќа „Вермилион“, специјализирана за книги за деца и млади. Станува збор за романите „Прва помош за самовили и други ѕверки од сказните“ од наградуваната шкотска писателка Лари Дон и „Последниот елф“ од познатата италијанска авторка Силвана де Мари. Преводот на македонски јазик на овие изданија се реализира со поддршка од Програмата за култура на Европската Унија.
Романот „Прва помош за самовили и други ѕверки од сказните“ покажува зошто критиката ја прогласи авторката Лари Дон за „новото големо име во литературата за деца.“ Една вечер Хелен ја отвара вратата и на својот праг наоѓа необично момче. Момче на кое му е потребна прва помош... од ветеринар. Но мајката на Хелен, локалниот ветеринар, верува само во книги за наука и нема да поверува во ова момче, па затоа Хелен ја позајмува ветеринарната опрема, му ја лекува раната и дознава како  се повредил. Така Хелен тргнува во потрага по една изгубена книга, учествува во битка кај шумата Бордерс, заседа во Оркни и бркотница низ темните тунели под Единбург. Таа открива дека има дарба за гатанки и прва помош и се запознава со многу други ѕверки од приказните. Шкотската авторка Лари Дон е родена во Чиле. Добитник е на наградата Канонгејт во 2001 година. Живее во Леит како писател и раскажувач, посетува училишта и зборува за своите книги за деца и раскажува традиционални шкотски приказни низ целиот свет. Преводот од англиски јазик е на Марија Тодорова, добитничка на наградата „Златно перо“ за најдобар превод. (210 стр., за возраст 9-14 години)

 Романот „Последниот елф“ од Силвана де Мари е навистина оригинална приказна која ќе го разнежни срцето и ќе ги магепса сите љубители на фантастиката. Во една опустошена земја, поплавена од пороен дожд, последниот елф ќе го спасат двајца луѓе што не знаат ништо за движењето на ѕвездите и за историјата, но ја знаат бедата. Кога Јорш случајно ќе го прочита пророштвото во една пештера, ќе сфати дека неговото патување има многу поголемо значење од обично бегање од временската непогода! Елфот ќе разбере дека само заедно со суштествата кои се поинакви од него, не само што ќе преживее, туку и ќе го спаси светот. Италијанската авторка Силвана де Мари е родена во 1953 год. во Казерта. Работела како хирург во Италија и во Етиопија, како волонтер, па откако заклучила дека душевните болки можат да бидат не помалку разорни од телесните, почнала да се занимава со психотерапија. Нејзиното основно хоби е да се лути. За да направи нешто со својата лутина одлучила да пишува за неправдите, прогонствата, дискриминацијата и бунтот во форма на приказни. „Последниот елф“ е нејзин прв роман и е добитник на низа награди, меѓу кои Андерсен во 2004, Банкарелино во 2005, Милдред Л. Бачелдер во 2007, и од Здружението на библиотеки за деца во 2007. Преводот од италијански јазик е на Анета Симовска. (300 стр., за возраст 9-14 години)